تناسيتي ورحتي وارتديتي ثوب هجراني
وانا الذكرى اهلكتني وارتديت من العذاب ثياب
تركتيني على درب العناء والحزن وحداني
الملم حظي الخايب واطارد زيفك الكذاب
تجاهلتي شعوري مارحمتي نازف اشجاني
وبين عروق قلبي للأسى فجأه غرستي ناب
وفاض الدمع من عيني وناره تحرق اوجاني
وغابت شمس عشقك والسناء من شمس عمري غاب
ذبحتي بالمحبة خاطري كسرتي اغصاني
وبعد الحب قلتي ماحصل يمكن يكون اعجاب
وليته مثلما قلتي .... الا ياطول حرماني
اثاره حرب نفسيه علي ولعب بالأعصاب
فحبي من طرف واحد وحبك في طرف ثاني
بعد لعبك ضحكتي لي وانا من داخلي منصاب
حسبتك فرحتي واثرك زيادة بس فاحزاني
وفي همي ودمعاتي ومابه للدموع اسباب
أسف قدمت انا نفسي ضحية لك وانا الجاني
على نفسي وانا الغلطان لاني ماحسبت حساب
ولاهو العذر فرق العمر والا بعد الاوطاني
كذا لالا تقولي بس قولي ويش جاب لجاب
فمان الله روحي وابعد عني وماجاني
يكفيني زيادة فوق هذا ظني اللي خاب
واذا قلبك مطار بيوم حطت فيه جنحاني
فانا لا تحسبي قلبي عماره مالها بواب
اريدك تنسي اسمي .. صورتي .. رقمي وعنواني
كذا من دون تنصدمي ولاداعي للأستغراب
وببقى في السطور اللي كتبتيها على شاني
مجرد بضعة احرف لامحل لها من الاعراب
ولا اريدك تقولي باحسبك مثل اصغر اخواني
اريدك تحسبيني في حياتك (فص ملح وذاب)
ويمكن حبنا يبقى بوجدانك ووجداني
فقط ذكرى قديمة بس لايمكن نعود اصحاب
تناسي وابعدي كم خِل من قبلك تناساني
تناسي والحقي ركب الحبايب يا آخر الآحباب
تناسي واطلعي من وسط قلبي بعد خلاني
ولاتنسي بعد ما تطلعين تسكرين الباب